ఆనందం (1)

1.      ఎండలన్ని తగ్గిపోయి వానొచ్చిన ఆనందం

ఎండవాన కలిసినపుడు విల్లొచ్చిన ఆనందం

ఆరుబయట వెన్నెలలో నిదురించిన వేళలోన
ఒక్కసారి సొంతఊరు వెళ్ళొచ్చిన ఆనందం.   

కన్నవారి కలలు దీర్చు సమయమ్మున కన్నులలో
కష్టపడిన ఫలితానికి గెలుపొచ్చిన ఆనందం.

తిరుమలగిరి కొండపైన వెంకన్నను చూడగానె
నల్లనయ్య మాఇంటికి నడిచొచ్చిన ఆనందం.

చినుకు తడికి చిగురుతొడిగి పూవులన్ని విరబూయగ
ఆతారలు నాచేతికి అందొచ్చిన ఆనందం.

అస్మదీయులందరినీ అక్షరాల కలియువేళ
విస్మయముగ షేర్లనడుమ విరుపొచ్చిన ఆనందం

పాతతెలుగు పాటలన్ని పరిమళాలె శైలజా
గుండెగొంతులోన కదలి పాటొచ్చిన ఆనందం.