అవసరమేగా....

వెన్నెలకాంతులు జారాలంటే జాబిలినవ్వులు అవసరమేగా
సిగ్గులనిగ్గులు తేలాలంటే సరసపు చెణుకులు అవసరమేగా

ఆమని వేళల హాయిగ కోయిల రాగము లెన్నో తీసెనులే

పాటల మాధురి పొందాలంటే పచ్చని తరువులు అవసరమేగా

కవితా సుమములు పూయాలంటే మదిలో మధనం జరగాలి

కలకాలం అవి నిలవాలంటే కమ్మని పలుకులు అవసరమేగా

మాటలకందని వేదనలేవో మనసునే మెలిపెడుతుంటే

మోమున నవ్వులు విరియాలంటే ముత్యపు చినుకులు అవసరమేగా

పురినే విప్పుతు  ఆనందంతో నెమలియె నాట్యంచేసింది

నయనానందపు నర్తనచూడగ నల్లని మబ్బులు అవసరమేగా

పూచిన పూవులు మురియాలంటే దేవుని సన్నిధి చేరాలి

పూవుల కోరిక తీరాలంటే కోమలి కరములు అవసరమేగా…!!!