వాన చినుకుల ప్రేయసి

నేలతల్లికి దప్పికంతను దిద్ది వేసెను వానచినుకులె

పూలతీవెకు కొత్తవన్నెల నద్ది వేసెను వానచినుకులె

ఆకసమ్మున ధారలన్నియు అంతకంతకు హద్దుమీరెను

కాగితమ్ముల పడవలన్నియు గుర్తుచేసెను వానచినుకులె

పూలగొడుగును చేతబట్టుకు నీటిముత్యములేరుతుంటే

నాడు ఆడిన ఆటలన్నియు రాశిపోసెను వానచినుకులె

ఆకతాయీ చల్లగాలులె ఆనవాళ్ళను ఒడిసిపడితే

యవ్వనమ్మున రాగసుధలను అందజేసెను వానచినుకులె

పచ్చపచ్చని తరువులన్నియు ప్రణయరాగము లాలపిస్తే

కరిగి పోయిన కాలమంతయు కనుల నిలిపెను వానచినుకులె

నీలికలువా చందురేడని కొండకోనా అడుగుతుంటే

వానవిల్లున ప్రేమలేఖను  పంపుచుండెను వానచినుకులె!!!

మనసా....

నా మనసే నీదయితే నవ్వులెన్ని కురిసాయో

నా ఊహల వాటికలో పూవులెన్ని మెరిసాయో

ఆశలెన్ని రేపావో ఈ పిడికెడు హృదయంలో

శ్వాసలైన వేళలలో స్వరములెన్ని మెరిసాయో

జ్ఞాపకాల సింధువులో దాచుకున్న ముత్యాలే

జాలువాఱు తరుణాన రవ్వలెన్ని మెరిశాయో

పాటలెన్ని పాడావో వలపుల పూదోటలో

బుగ్గలపై కెంపుచూసి సిగ్గులెన్ని మెరిశాయో

నీకన్నుల వాకిలిలో నన్నునేను దాచాలే

కావలిగా నేనుంటే కబురులెన్ని మెరిశాయో

చేరువలో నన్నుచూసి వీడుకోలు చెబుతావే

తీయనైన వేదనలో కవితలెన్ని మెరిశాయో!!!

అమ్మ ప్రేమకు వందనం

కాలమంత నీతోనే గడపాలని ఉన్నదిలే

నాబాల్యం  నీలోనే చూడాలని ఉన్నదిలే

ఒక్కక్షణము నినువీడి నిలువలేనులే నానీ

లాలపోసి జోలపాట పాడాలని ఉన్నదిలే

చిన్నిచిన్ని చేతులతో చిత్తరాలు చేస్తుంటే

యశోదమ్మనై నీతో ఆడాలని ఉన్నదిలే

బ్రహ్మైనా చెప్పలేని భాషలోన పలుకుతుంటె

అమ్మకన్ని తెలుసునని చెప్పాలని ఉన్నదిలే

పేగుతెంచుకున్న ప్రేమ ఎవ్వరికీ తెలియదుగా

అమ్మనీకు బొమ్మయనీ తెలపాలని ఉన్నదిలే!!!

2.

మమత కర్ధము తెలియజేసిన మాతృ ప్రేమకు వందనమ్ములు

బ్రతుకు తీపిని పంచిఇచ్చిన మాతృ ప్రేమకు వందనమ్ములు

తాను తిన్నను తినకపోయిన తనదు బిడ్డల కడుపు నింపుచు

కంటిరెప్పగ గాచి పెంచెడు కన్నప్రేమకు వందనమ్ములు

వీర జిజియాబాయి రీతిగ దేశభక్తిని పెంచుచూమది

ఉగ్గుపాలను రంగరించిన అమ్మప్రేమకు వందనమ్ములు

అవధిమీరిన మమత జూపుచు సాకె వెన్నుని ఆయశోదే

అంగరాజును పెంపుజేసిన రాధప్రేమకు వందనమ్ములు

పుత్రుడైనను పుత్రికైనను ఒక్కరీతిగ ముద్దుజేయుచు

కుప్పతొట్టెల విసరి వేయని నేటి అమ్మకు వందనమ్ములు!!!

మనసుకీ

గరికలా ఒదుగుటే బోధించు మనసుకీ

ధరణిలా ఓరిమే నేర్పించు మనసుకీ

ముళ్ళున్న పూలున్న రాదారి పొడవునా

నీ ప్రేమ సవ్వడిని చూపించు మనసుకీ

చీకట్ల పరదాలు చిటికెలో ననుచుడితె

చిరునవ్వు దీపాలు వెలిగించు మనసుకీ

కన్నీటి కడలిలో ఎదురీద లేకుంటె

చుక్కానివై నీవు నడిపించు మనసుకీ

పువ్వులా కాసేపు ముల్లులా కాసేపు

కవ్వించు చెలిప్రేమ మురిపించు మనసుకీ

చింతలూ వంతలూ ఎంతలో కరుగులే

చిత్రంగా జగతినే గమనించు మనసుకీ

కన్నీటి ముత్యాలు కనబడక దాచాను

కాసిన్ని నవ్వులే పంపించు మనసుకీ

బాధనే మరువనీ భావనే మధురమూ

శైలజా నీపాట వినిపించు మనసుకీ!!!

దేవునితో ఒక్కమాట

దేవునితో ఒక్కమాట చెప్పాలనివుందీ
జీవమెందుకిచ్చావని అడగాలని వుంది

దారుణములు చూస్తున్నా నోరు మెదపలేని
మనసు నెందుకిచ్చావని అడగాలనివుంది

కులమతాల పేరిట సంకులసమరమ్ము జూసి
కన్నీటి నెందుకిచ్చావని అడగాలనివుంది

దానవత్వమే ధరణిని కబళిస్తుంటే
ఆశ లెందుకిచ్చావని అడగాలనివుంది

అక్షరతూణీరములు వదలెడు ఓ శైలజా
మాటలెందుకిచ్చావని అడగాలనివుంది..