వాన చినుకుల ప్రేయసి

నేలతల్లికి దప్పికంతను దిద్ది వేసెను వానచినుకులె

పూలతీవెకు కొత్తవన్నెల నద్ది వేసెను వానచినుకులె

ఆకసమ్మున ధారలన్నియు అంతకంతకు హద్దుమీరెను

కాగితమ్ముల పడవలన్నియు గుర్తుచేసెను వానచినుకులె

పూలగొడుగును చేతబట్టుకు నీటిముత్యములేరుతుంటే

నాడు ఆడిన ఆటలన్నియు రాశిపోసెను వానచినుకులె

ఆకతాయీ చల్లగాలులె ఆనవాళ్ళను ఒడిసిపడితే

యవ్వనమ్మున రాగసుధలను అందజేసెను వానచినుకులె

పచ్చపచ్చని తరువులన్నియు ప్రణయరాగము లాలపిస్తే

కరిగి పోయిన కాలమంతయు కనుల నిలిపెను వానచినుకులె

నీలికలువా చందురేడని కొండకోనా అడుగుతుంటే

వానవిల్లున ప్రేమలేఖను  పంపుచుండెను వానచినుకులె!!!